2020 жылы пандемия шектеулері кезінде елдегі тұрмыстағы зорлық-зомбылық көлемі шамамен екі еседей өсті. БҰҰ деректеріне сәйкес, зорлық-зомбылық салдарынан Қазақстанда жыл сайын 400-ге жуық әйел қайтыс болады. Бұл тек ресми мәлімет. Сарапшылардың пікірінше, отбасы ішінде болатын көптеген құқықбұзушылық ресми тіркелмейді.
Физикалық я психологиялық зорлық-зомбылықтан бөлек, қоғамда әйелдер қауымы кездесуі мүмкін көптеген мәселе бар. Әйгерім әрбір адам заңгер көмегіне жүгіне алмайтынын, ал көпшілікке арналған нұсқаулық түрлі мәселеге қысқа әрі нақты шешім ұсынатынын айтады. Мысалы, декреттік демалыстың төлемі қалай есептеледі және қандай жағдайда оны көбірек алуға болады? Ажырасу кезінде нені білген жөн және алиментті қалай өндіруге болады? Шұғыл жағдайларда керек болатын нөмірлер тізімі. Сондай-ақ автордың әлеуметтік желі парақшасына келіп түскен сұрақтардың жауабы берілген.
«Қазақстан – құқықтық мемлекет. Елімізде əрбір азаматымыздың құқығы қорғалуға тиіс. Заң – баршаға ортақ. Қазақ əйелдерінің заңдық тұрғыдан сауатты болуы – қоғамның маңызды талаптарының бірі», – дейді Әйгерім Ермекбай нұсқаулық кітапшасында.
